ଆମ ନିର୍ବାଚନମଣ୍ଡଳୀ : ଚିଲିକା

ବାଣପୁର ବ୍ଲକ, ଚିଲିକା ବ୍ଲକ, ବାଣପୁର ଏନଏସି ଓ ବାଲୁଗାଁ ଏନଏସିକୁ ନେଇ ଚିଲିକା ବିଧାନସଭା ନିର୍ବାଚନମଣ୍ଡଳୀ ଗଠିତ ହୋଇଛି  । ନିର୍ବାଚନ କମିଶନଙ୍କ ଆଧାରରେ ଏହି ନିର୍ବାଚନମଣ୍ଡଳୀର କ୍ରମିକ ସଂଖ୍ୟା ହେଉଛି ୧୧୮ । ୧୯୭୪ରେ ପ୍ରଥମ ଥର ପାଇଁ ଚିଲିକାରେ ନିର୍ବାଚନ ଅନୁଷ୍ଠିତ ହୋଇଥିଲା । କଂଗ୍ରେସ ନେତା ରଘୁନାଥ ରାୟ ପ୍ରଥମ ବିଧାୟକ ହେବାର ସୌଭାଗ୍ୟ ଅର୍ଜନ କରିଥିଲେ  । ୧୯୭୭ରେ ଚିଲିକା ରାଜନୀତିରେ ବିଶ୍ୱଭୂଷଣ ହରିଚନ୍ଦନଙ୍କର ଅଭ୍ୟୁଦୟ ଘଟିଥିଲା  । ଛାତ୍ର ସମୟରୁ ସେ ରାଜନୀତି କରି ବେଶ ସଫଳ ହୋଇଛନ୍ତି  । ୧୯୭୭ ଓ ୧୯୯୦ରେ ସେ ଚିଲିକାରୁ ପ୍ରତିନିଧିତ୍ୱ କରିଥିବାବେଳେ ୧୯୯୬, ୨୦୦୦ ଓ ୨୦୦୪ରେ ବିଶ୍ୱଭୂଷଣ ଭୁବନେଶ୍ୱରରୁ ବିଧାୟକ ହୋଇଥିଲେ  । ନୀଳମଣି ରାଉତରାୟ, ବିଜୁ ପଟ୍ଟନାୟକ ଓ ନବୀନ ପଟ୍ଟନାୟକଙ୍କ ମନ୍ତ୍ରୀ ମଣ୍ଡଳରେ ସେ ଗୁରୁ ଦାୟିତ୍ୱ ପାଇଥିଲେ  ।  ଆନ୍ଧ୍ରପ୍ରଦେଶର ରାଜ୍ୟପାଳ ଭାବେ କାର୍ଯ୍ୟ କରିଥିବା ବିଶ୍ୱଭୂଷଣ ଏବେ ଛତିଶଗଡ଼ର ରାଜ୍ୟପାଳ ଅଛନ୍ତି  । 

୧୯୮୦ ଦଶକରେ ଚିଲିକାରେ ଡାକ୍ତର ଦେବେନ୍ଦ୍ର ମାନସିଂହଙ୍କ ରାଜ ଚାଲିଥିଲା  । ଛାତ୍ର ରାଜନୀତିରୁ ସେ କ୍ୟାରିୟର ଆରମ୍ଭ କରିଥିବାବେଳେ ବାଣପୁର ବ୍ଳକ ଅଧ୍ୟକ୍ଷ ମଧ୍ୟ ରହିଥିଲେ  । ୧୯୮୦, ୧୯୮୫ ଓ ୧୯୯୫ରେ ସେ ବିଜୟୀ ହୋଇଥିଲେ  । ଜାନକୀ ପଟ୍ଟନାୟକଙ୍କ ସରକାରରେ ସେ ମନ୍ତ୍ରୀ ମଧ୍ୟ ଥିଲେ  । ଖାଲି ରାଜନୀତି ନୁହେଁ ସାହିତ୍ୟ କ୍ଷେତ୍ରରେ ବି ତାଙ୍କର ସୁନାମ ରହିଛି  ।

୨୦୦୦ ମସିହାରୁ ଚିଲିକା ରାଜନୀତି ନୂଆ ମୋଡ଼ ନେଇଛି  । ସେବେଠାରୁ ଆଉ କଂଗ୍ରେସ ଜିତି ପାରିନାହିଁ  । ବିଜେଡ଼ି ଓ ବିଜେପି ମେଂଟ ଯୋଗୁଁ ୨୦୦୦ ଓ ୨୦୦୪ରେ ବିଜେପି  ବିଜୟୀ ହୋଇଥିଲା  । ଡାକ୍ତର ବିଭୂତି ଭୂଷଣ ହରିଚନ୍ଦନ ବାଜିମାତ କରିଥିଲେ  । ଜଣେ ଡାକ୍ତର ଓ ସମାଜସେବୀ ଭାବେ ଚିଲିକାରେ ତାଙ୍କର ବେଶ ସୁନାମ ରହିଛି  । ୨୦୧୪ରେ  ସେ ତୃତୀୟ ଥର ପାଇଁ ଚିଲିକାରୁ ବିଧାୟକ ହେବାର ସୌଭାଗ୍ୟ ପାଇଥିଲେ  । 

୨୦୦୯ରେ ବିଜେଡ଼ି ନେତା ରଘୁନାଥ ସାହୁ ଓ ୨୦୧୯ରେ ପ୍ରଶାନ୍ତ କୁମାର ଜଗଦ୍ଦେବ ଚିଲିକାରୁ ବିଧାୟକ ହୋଇଥିଲେ  । ମୋଟାମୋଟି ଭାବେ ଦେଖିଲେ ଡାକ୍ତର ଦେବେନ୍ଦ୍ର ମାନସିଂହ ଓ ଡାକ୍ତର ବିଭୂତି ଭୂଷଣ ହରିଚନ୍ଦନଙ୍କୁ ଚିଲିକା ବାସୀ ତିନି ତିନି ଥର ସୁଯୋଗ ଦେଇଛନ୍ତି  । ସେହିପରି ବିଶ୍ୱଭୂଷଣ ଦୁଇଥର ଜିତିଥିବାରୁ ଚିଲିକା ରାଜନୀତିରେ ହରିଚନ୍ଦନ ପରିବାରର ଦବଦବା ଦେଖିବାକୁ ମିଳେ  ।  

ରାମଚଣ୍ଡୀ ପ୍ରସାଦ ରଣସିଂହ
ପରିଚାଳନା ସମ୍ପାଦକ
ଜାଗ୍ରତ ଓଡ଼ିଶା
ଓଡ଼ିଆ ସ୍ପଟ ନ୍ୟୁଜ