ଆମ ନିର୍ବାଚନମଣ୍ଡଳୀ : ପାଲଲହଡ଼ା ବିଧାନସଭା 

ସାଧାରଣ ନିର୍ବାଚନ ପାଖେଇ ଆସୁଛି  । ରାଜନୀତିକ ମାହୋଲକୁ ନେଇ ଜୋରଦାର ଚର୍ଚ୍ଚା ବି ଆରମ୍ଭ ହୋଇଗଲାଣି  । ଏହାକୁ ଆଖି ଆଗରେ ରଖି ଆମେ ଆରମ୍ଭ କରିଛୁ ‘ଆମ ନିର୍ବାଚନମଣ୍ଡଳୀ’ । ଏଥିରେ ଓଡ଼ିଶାର ୧୪୭ ବିଧାନସଭା ଓ ୨୧ ଲୋକସଭା ଆସନ ସଂକ୍ରାନ୍ତୀୟ ତଥ୍ୟର ଅବତାରଣା କରାଯିବ  । ଏଥର ଆମେ ଅନୁଗୁଳ ଜିଲ୍ଲାର ପାଲଲହଡ଼ା ବିଧାନସଭା ନିର୍ବାଚନମଣ୍ଡଳୀ ଉପରେ ଆଲୋଚନା କରିବା  ।

ପାଲଲହଡ଼ା ବ୍ଲକ ଓ କଣିହା ବ୍ଲକର ୧୯ ଗ୍ରାମ ପଂଚାୟତକୁ ନେଇ ଏହି ନିର୍ବାଚନମଣ୍ଡଳୀ ଗଠିତ ହୋଇଛି  । ପ୍ରଥମ ସାଧାରଣ ନିର୍ବାଚନ ସମୟରେ ଏହି ନିର୍ବାଚନମଣ୍ଡଳୀର ନାମ ଥିଲା ପାଲଲହଡ଼ା-କାମାକ୍ଷାନଗର  । ସାଧାରଣ ବର୍ଗରୁ ମହେଶ ଚନ୍ଦ୍ର ସୁବାହୁସିଂ ଓ ସଂରକ୍ଷିତ ବର୍ଗରୁ ବାଇଧର ନାଏକ ପାଲଲହଡ଼ାରୁ ପ୍ରତିନିଧିତ୍ୱ କରିଥିଲେ  । ୧୯୫୭ ନିର୍ବାଚନରେ ଗଣତନ୍ତ୍ର ପରିଷଦର ନେତା ମୃତ୍ୟୁଞ୍ଜୟ ପାଲ ବିଧାୟକ ହୋଇଥିଲେ  । ୧୯୬୧ ନିର୍ବାଚନରେ ମଇଦାନକୁ ଓହ୍ଲାଇଥିଲେ ଲୋକପ୍ରିୟ ନେତା ପବିତ୍ର ମୋହନ ପ୍ରଧାନ  । ଜନକଂଗ୍ରେସ ଟିକେଟରେ ସେ ୧୯୬୧ ଓ ୧୯୬୭ ନିର୍ବାଚନରେ ବାଜିମାତ କରିଥିଲେ  । ଢେଙ୍କାନାଳ ଓ ଅନୁଗୁଳରେ ତାଙ୍କର ବେଶ ପ୍ରଭାବ ରହିଥିଲା  । ପାଲଲହଡ଼ା ବ୍ୟତୀତ ଆଠଗଡ଼ ଓ ତାଳଚେର ବିଧାନସଭା ନିର୍ବାଚନମଣ୍ଡଳୀରୁ ସେ ୭ ଥର ବିଜୟ ଲାଭ କରିଛନ୍ତି  । ଏହାଛଡ଼ା ସେ ଦେବଗଡ଼ର ସାଂସଦ ମଧ୍ୟ ଥିଲେ  । 

୧୯୭୧ ଓ ୧୯୭୪ ନିର୍ବାଚନରେ ଏଠାରୁ ବାଜି ମାରିଥିଲେ ନାରାୟଣ ସାହୁ  । ପରେ ସେ ଦେବଗଡ଼  ସାଂସଦ ହେବାର ସୌଭାଗ୍ୟ ପାଇଥିଲେ  । ନାରାୟଣଙ୍କ ପରେ ପାଲଲହଡ଼ା ବିଧାୟକ ହୋଇଥିଲେ ଧରଣୀଧର ପ୍ରଧାନ  । ସ୍ୱାଧୀନ ଭାବେ ଲଢ଼ିଥିଲେବି ଲୋକମାନେ ତାଙ୍କ ଉପରେ ଆସ୍ଥା ପ୍ରକଟ କରିଥିଲେ  । 

୧୯୮୦ ଦଶକରେ ଏଠାରେ ରାଜ କରିଥିଲେ ବିଭୂଧେନ୍ଦ୍ର ପ୍ରତାପ ଦାସ  । କଂଗ୍ରେସ ଟିକେଟରେ ସେ ୧୯୮୦ ଓ ୧୯୮୫ରେ ବିଧାୟକ ହୋଇଥିଲେ  । ଅନେକ ବର୍ଷ ଧରି ପାଲଲହଡ଼ାରେ କଂଗ୍ରେସ ହିଁ ଜିତି ଆସୁଥିଲା  । କିନ୍ତୁ ୧୯୯୦ ନିର୍ବାଚନରେ ଜନତା ଦଳ ନେତା ଡାକ୍ତର ନୃସିଂହ ଚରଣ ସାହୁ ବିଜୟୀ ହୋଇଥିଲେ  । ତେବେ ଜନତା ଦଳ ବିଜୟ ଧାରା ରକ୍ଷା କରିବାରେ ବିଫଳ ହୋଇଥିଲା  । ୧୯୯୫ରେ କଂଗ୍ରେସ ନେତା ବିଭୂଧେନ୍ଦ୍ର ବାଜିମାତ କରି ତୃତୀୟ ଥର ପାଇଁ ପାଲଲହଡ଼ାରୁ ପ୍ରତିନିଧିତ୍ୱ କରିଥିଲେ  । 
୨୦୦୦ ମସିହା ନିର୍ବାଚନ ବେଳକୁ ବିଜେଡ଼ି ଓ ବିଜେପି ମଧ୍ୟରେ ମେଂଟ ଥିଲା  । ବିଜେପି ଟିକେଟରେ ନିର୍ବାଚନ ଲଢ଼ି କମ ବୟସରେ ବିଧାୟକ ହୋଇଥିଲେ ଧର୍ମେନ୍ଦ୍ର ପ୍ରଧାନ  । ପରେ ସେ ଦେବଗଡ଼ର ସାଂସଦ ବି ହୋଇଥିଲେ  । ବିହାର ଓ ମଧ୍ୟପ୍ରଦେଶରୁ ରାଜ୍ୟସଭା ସାଂସଦ ହୋଇଥିବା ଧର୍ମେନ୍ଦ୍ର ଏବେ କେନ୍ଦ୍ରମନ୍ତ୍ରୀ ଅଛନ୍ତି  । ୨୦୦୪ରେ କଂଗ୍ରେସରୁ ଲଢ଼ି ନୃସିଂହ ସାହୁ ଦ୍ୱିତୀୟ ଥର ପାଇଁ ପାଲଲହଡ଼ା ବିଧାୟକ ହୋଇଥିଲେ  । ୨୦୦୯ରୁ ପାଲଲହଡ଼ାରେ ବିଜେଡ଼ି ରାଜ ଦେଖିବାକୁ ମିଳୁଛି  । ୨୦୦୯ରେ ବିଜେଡ଼ି ନେତା ରବି ନାରାୟଣ ପାଣି ବିଧାୟକ ହେବାର ସୌଭାଗ୍ୟ ପାଇଥିଲେ  । ୨୦୧୪ରେ ମହେଶ ସାହୁ ବାଜିମାତ କରିଥିବାବେଳେ ୨୦୧୯ରେ ବିଧାୟକ ହୋଇଥିଲେ ମୁକେଶ କୁମାର ପାଲ  । ମୋଟାମୋଟି ଭାବେ ଦେଖିଲେ ପାଲଲହଡ଼ାରେ ବିଭୂଧେନ୍ଦ୍ର ସର୍ବାଧିକ ୩ ଥର ବିଧାୟକ ହୋଇପାରିଛନ୍ତି  ।  ଅପରପକ୍ଷରେ ପବିତ୍ର ପ୍ରଧାନ, ନାରାୟଣ ସାହୁ, ନୃସିଂହ ସାହୁ ୨ଥର ବିଧାୟକ ହେବାରେ ସଫଳ ହୋଇଛନ୍ତି  । ୨୦୦୦ ମସିହାରୁ ପ୍ରତି ନିର୍ବାଚନରେ ପାଲଲହଡ଼ାବାସୀ ନୂଆ ବିଧାୟକ ଦେଖି ଆସୁଛନ୍ତି  ।

ରାମଚଣ୍ଡୀ ପ୍ରସାଦ ରଣସିଂହ
ପରିଚାଳନା ସମ୍ପାଦକ
ଜାଗ୍ରତ ଓଡ଼ିଶା
ଓଡ଼ିଆ ସ୍ପଟ ନ୍ୟୁଜ୍‌